Hanuman Chalisa

जय हनुमान ज्ञान गुन सागर। जय कपीस तिहुँ लोक उजागर॥

Jaya hanumāna jñāna guna sāgara | Jaya kapīsa tihu loka ujāgara ||

राम दूत अतुलित बल धामा। अंजनि-पुत्र पवनसुत नामा॥

Rāma dūta atulita bala dhāmā | Añjani-putra pavanasuta nāmā ||

महाबीर बिक्रम बजरंगी। कुमति निवार सुमति के संगी॥

Mahābīra bikrama bajaraṅgī | Kumati nivāra sumati ke saṅgī ||

कंचन बरन बिराज सुबेसा। कानन कुंडल कुंचित केसा॥

Kañcana barana birāja subesā | Kānana kuṇḍala kuñcita kesā ||

हाथ बज्र औ ध्वजा बिराजै। काँधे मूँज जनेऊ साजै॥

Hātha bajra au dhvajā birājai | Kāndhe mūñja jane'ū sājai ||

शंकर सुवन केसरीनंदन। तेज प्रताप महा जग बंदन॥

Śaṅkara suvana kesarīnandana | Teja pratāpa mahā jaga bandana ||

बिद्यावान गुनी अति चातुर। राम काज करिबे को आतुर॥

Bidyāvāna gunī ati cātura | Rāma kāja karibe ko ātura ||

प्रभु चरित्र सुनिबे को रसिया। राम लखन सीता मन बसिया॥

Prabhu caritra sunibe ko rasiyā | Rāma lakhana sītā mana basiyā ||

सूक्ष्म रूप धरि सियहिं दिखावा। बिकट रूप धरि लंक जरावा॥

Sūkṣma rūpa dhari siyahi dikhāvā | Bikaṭa rūpa dhari laṅka jarāvā ||

भीम रूप धरि असुर सँहारे। रामचंद्र के काज संवारे॥

Bhīma rūpa dhari asura saṁhāre | Rāmacandra ke kāja saṁvāre ||

लाय सजीवन लखन जियाये। श्रीरघुबीर हरषि उर लाये॥

Lāya sajīvana lakhana jiyāye | Śrīraghubīra haraṣi ura lāye ||

रघुपति कीन्ही बहुत बड़ाई। तुम मम प्रिय भरतहि सम भाई॥

Raghupati kīnhī bahuta baṛā'ī | Tuma mama priya bharatahi sama bhā'ī ||

सहस बदन तुम्हरो जस गावैं। अस कहि श्रीपति कंठ लगावैं॥

Sahasa badana tumharo jasa gāvai | Asa kahi śrīpati kaṇṭha lagāvai ||

सनकादिक ब्रह्मादि मुनीसा। नारद सारद सहित अहीसा॥

Sanakādika brahmādi munīsā | Nārada sārada sahita ahīsā ||

जम कुबेर दिगपाल जहाँ ते। कबि कोबिद कहि सके कहाँ ते॥

Jama kubera digapāla jahā te | Kabi kobida kahi sake kahā te ||

तुम उपकार सुग्रीवहिं कीन्हा। राम मिलाय राज पद दीन्हा॥

Tuma upakāra sugrīvahi kīnhā | Rāma milāya rāja pada dīnhā ||

तुम्हरो मंत्र बिभीषन माना। लंकेस्वर भए सब जग जाना॥

Tumharo mantra bibhīṣana mānā | Laṅkesvara bha'e saba jaga jānā ||

जुग सहस्र जोजन पर भानू। लील्यो ताहि मधुर फल जानू॥

Juga sahasra jojana para bhānū | Līlyo tāhi madhura phala jānū ||

प्रभु मुद्रिका मेलि मुख माहीं। जलधि लाँघि गये अचरज नाहीं॥

Prabhu mudrikā meli mukha māhī | Jaladhi lāṅghi gaye acaraja nāhī ||

दुर्गम काज जगत के जेते। सुगम अनुग्रह तुम्हरे तेते॥

Durgama kāja jagata ke jete | Sugama anugraha tumhare tete ||

राम दुआरे तुम रखवारे। होत न आज्ञा बिनु पैसारे॥

Rāma du'āre tuma rakhavāre | Hota na ājñā binu paisāre ||

सब सुख लहै तुम्हारी सरना। तुम रच्छक काहू को डर ना॥

Saba sukha lahai tumhārī saranā | Tuma racchaka kāhū ko ḍara nā ||

आपन तेज सम्हारो आपै। तीनों लोक हाँक तें काँपै॥

Āpana teja samhāra'o āpai | Tīnoṁ loka hāṅka teṁ kāmpai ||

भूत पिसाच निकट नहिं आवै। महाबीर जब नाम सुनावै॥

Bhūta pisāca nikaṭa nahiṁ āvai | Mahābīra jaba nāma sunāvai ||

नासै रोग हरै सब पीरा। जपत निरंतर हनुमत बीरा॥

Nāsai roga harai saba pīrā | Japata nirantara hanumata bīrā ||

संकट तें हनुमान छुड़ावै। मन क्रम बचन ध्यान जो लावै॥

Saṅkaṭa teṁ hanumāna chuṛāvai | Mana krama bacana dhyāna jo lāvai ||

सब पर राम तपस्वी राजा। तिन के काज सकल तुम साजा॥

Saba para rāma tapasvī rājā | Tina ke kāja sakala tuma sājā ||

और मनोरथ जो कोई लावै। सोइ अमित जीवन फल पावै॥

Aura manoratha jo ko'ī lāvai | So'i amita jīvana phala pāvai ||

चारों जुग परताप तुम्हारा। है परसिद्ध जगत उजियारा॥

Cāroṁ juga baratāpa tumhārā | Hai parasiddha jagata ujiyārā ||

साधु-संत के तुम रखवारे। असुर निकंदन राम दुलारे॥

Sādhu-santa ke tuma rakhavāre | Asura nikandana rāma dulāre ||

अष्ट सिद्धि नौ निधि के दाता। अस बर दीन्ह जानकी माता॥

Aṣṭa siddhi nau nidhi ke dātā | Asa bara dīnha jānakī mātā ||

राम रसायन तुम्हरे पासा। सदा रहो रघुपति के दासा॥

Rāma rasāyana tumhare pāsā | Sadā raho raghupati ke dāsā ||

तुम्हरे भजन राम को पावै। जनम-जनम के दुख बिसरावै॥

Tumhare bhajana rāma ko pāvai | Janama-janama ke dukha bisarāvai ||

अन्त काल रघुबर पुर जाई। जहाँ जन्म हरि-भक्त कहाई॥

Anta kāla raghubara pura jā'ī | Jahāṁ janma hari-bhakta kahā'ī ||

और देवता चित्त न धरई। हनुमत सेइ सर्ब सुख करई॥

Aura devatā citta na dhara'ī | Hanumata se'i sarba sukha kara'ī ||

संकट कटै मिटै सब पीरा। जो सुमिरै हनुमत बलबीरा॥

Saṅkaṭa kaṭai miṭai saba pīrā | Jo sumirai hanumata balabīrā ||

जै जै जै हनुमान गोसाईं। कृपा करहु गुरुदेव की नाईं॥

Jai jai jai hanumāna gosā'īṁ | Kṛpā karahu gurudeva kī nā'īṁ ||

जो सत बार पाठ कर कोई। छूटहि बंदि महा सुख होई॥

Jo sata bāra pāṭha kara ko'ī | Chūṭahi bandi mahā sukha ho'ī ||

जो यह पढ़ै हनुमान चालीसा। होय सिद्धि साखी गौरीसा॥

Jo yaha paṛhai hanumāna cālīsā | Hoya siddhi sākhī gaurīsā ||

तुलसीदास सदा हरि चेरा। कीजै नाथ हृदय मँह डेरा॥

Tulasīdāsa sadā hari cerā | Kījai nātha hṛdaya mahaṁ ḍerā ||